ШҚО-ның бас полицейі ерлік көрсеткен қызметкерлердің балаларына мерекелік қуаныш сыйлады, - деп хабарлайды Polisia.kz.
Жаңа жыл қарсаңында Шығыс Қазақстан облысы полиция департаментінің бастығы Ерлан Омарбеков балаларға ерекше мереке сыйлады. Ол Аяз ата бейнесінде қызметтік борышын атқару кезінде қаза тапқан немесе қоғамдық тәртіпті қорғау барысында жарақат алған ішкі істер органдары қызметкерлерінің отбасыларын жеке барып құттықтады.
Әрбір үйге кірген сәттен бастап мейірімге, қуаныш пен шынайы сезімге толы мерекелік атмосфера орнады. Сыйлықтар, жылы лебіздер мен көрсетілген ілтипат балалар үшін жай ғана тосынсый емес, оларға деген құрмет пен қамқорлықтың белгісі болды. Балалардың күлкісі, шынайы қуанышы мен жаңа жылдық ғажайыпқа деген сенімі бұл күннің басты сыйына айналды.
Отбасылармен жүздесу барысында ШҚО полиция департаментінің бастығы олардың жақындарының ерлігі – батылдықтың, антқа адалдықтың және Отанға қалтқысыз қызмет етудің жарқын үлгісі екенін атап өтті. Бұл ерлік Қазақстан полициясының тарихында және әріптестерінің жүрегінде мәңгі сақталатынын жеткізді.
— Біз сіздермен тек қызмет барысында ғана емес, өмірдің әр сәтінде бірге болуды өзіміздің азаматтық әрі кәсіби міндетіміз деп санаймыз. Сіздердің жақындарыңыз ел тыныштығы үшін ең қымбат дүниесін құрбан етті. Сондықтан сіздерге және балаларыңызға қамқорлық көрсету – баршамызға ортақ жауапкершілік, — деді Ерлан Омарбеков.
Бұл күн ерлікке деген құрметтің тек марапаттар мен ресми құжаттармен шектелмейтінін, ең алдымен адамға деген шынайы қамқорлық пен жанашырлықтан көрінетінін дәлелдеді. Өйткені полициядағы қызмет — тек жауапкершілік пен парыз ғана емес, сонымен қатар ең қажетті сәтте қасынан табыла білу қабілеті.
