Шу полицейлері ірі көлемдегі ұрлық дерегін ашты, – деп хабарлайды Polisia.kz.
21 желтоқсанда Шу аудандық полиция бөліміне осы ауданның 31 жастағы тұрғыны белгісіз тұлғалардың дүкенінен түнгі уақытта жасырын түрде кіріп, 720 блок әртүрлі маркалы темекі бұйымдарын және 200 мың теңге ақшалай қаражатын ұрлап кеткендігі туралы арызданды. Келтірген шығын көлемі 5,3 млн теңгені құрады.
Аудандық полиция қызметкерлерімен жүргізілген жедел-іздестіру іс-шараларының нәтижесінде 34 жастағы Шу ауданының тұрғыны анықталып, ұсталды.
Тергеу жұмыстары барысында ұрлықтың алдын-ала сөз байласу арқылы жасалынғаны және ұрлаған темекі бұйымдарын Алматы қаласына барып 701 мың теңгеге сатып, ақшасын бөліп алғандығы белгілі болды.
Қазіргі уақытта қылмысқа қатысы бар екінші күдіктіге іздестіру жұмыстары жүргізіліп жатыр.
Ұсталған күдікті кінәсін толықтай мойындап, уақытша ұстау изоляторына қамауға алынды.
Аталған дерекке қатысты ҚР ҚК-нің 188-бабы 3-бөлігінің 3-тармағымен (Тұрғын, қызметтiк немесе өндiрiстiк үй-жайға, қоймаға не көлік құралына заңсыз кiрумен жасалған ұрлық) сотқа дейінгі тергеп-тексеру амалдары басталды.
Осы бапқа сәйкес мүлкi тәркiленіп, екі жылдан жетi жылға дейiнгi мерзiмге бас бостандығын шектеуге, не сол мерзімге бас бостандығынан айыру түріндегі жаза көзделген.
