Шымкентте Нұрсейт Жайнақов атындағы "Жас сақшы" полиция сыныбы ашылды, – деп хабарлайды Polisia.kz.
Шымкент қаласындағы Қазыбек би атындағы №36 мектепте қызметтік міндетін атқару кезінде ерлікпен қаза тапқан полиция қызметкері Нұрсейт Жайнақовтың құрметіне "Жас сақшы" мамандандырылған сыныбының салтанатты ашылу рәсімі өтті.
Аталған сынып жасөспірімдерді әскери-патриоттық рухта тәрбиелеу, құқықтық мәдениетін қалыптастыру және құқық қорғау органдарында қызмет етуге қызығушылық танытқан оқушылардың кәсіби бағдарын дамыту мақсатында ашылды.
Іс-шараға қатысқан полицейлер сыныпқа берілген есімнің ерлік, намыс пен Отан алдындағы адалдықтың айқын символы екенін атап өтті. Сондай-ақ ол жас ұрпақ үшін тәртіп, жауапкершілік пен үздіксіз өзін-өзі дамыту аса маңызды екенін ерекше атап өтті.
Салтанатты рәсімге қатысушылар "Жас сақшы" сыныбы патриоттық рухы жоғары, ел болашағына бейжай қарамайтын, жауапты азаматтарды тәрбиелеудің тиімді алаңына айналатынына сенім білдірді. Мамандандырылған сыныптың ашылуы – құқық қорғау органдарының болашақ кадрлық әлеуетін қалыптастыруға және жастар арасында азаматтық құндылықтарды нығайтуға қосылған маңызды үлес.
