Шымкентте ғажайып мереке қарсаңында қалалық полиция департаментінің қызметкерлерінің балаларына арналған дәстүрлі жаңажылдық шырша кеші өтті, – деп хабарлайды Polisia.kz.
Бұл іс-шара балалар мен олардың ата-аналарына ерекше мерекелік көңіл-күй сыйлады. Жаңажылдық кеш ерекше форматта ұйымдастырылып, театрландырылған концерттік бағдарлама мен түрлі өнер көрсетулермен басталды. Әртістер ән айтып, би билеп, көріністер мен сахналық қойылымдармен балаларды қуантты.
Ертегі кейіпкерлері балаларға түрлі эмоциялар сыйлап, олардың жүзі қуаныштан жарқырап тұрды. Кішкентай қонақтар үшін ұйымдастырылған бағдарлама ерекше әсер қалдырды. Қойылымды тамашалаған балалар үшін бұл сиқырлы сәттер болды.
Жаңа жылдық іс-шара балалардың жүректерінде ұмытылмас естеліктер мен қуанышты сәттер қалдырды. Достықтың символы ретінде бірге билеген балалар ән айтып, би билеп, Аяз ата мен Ақшақарға арналған мерекелік өлеңдер де айтылды. Кеш соңында балалар тәтті жаңа жылдық сыйлықтарға ие болып, мереке көңілді әрі шаттыққа толы аяқталды.
