Шымкенттік полицейлер көлігі өртке оранған жүргізушіге көмектесті, – деп хабарлайды Polisia.kz.
Шымкент қаласы Республика даңғылының бойында Volkswagen Passat көлігінен ақау шығып, отқа оранған. Осы сәтте қызметте тұрған патрульдік полиция полкінің қызметкерлері жедел көмек көрсетуге кіріседі.
Өздерінің мемлекеттік автокөліктерінен өрт сөндіру құралын алып, жалынды ауыздықтаған. Осылайша темір тұлпардың толық өртке орануының алдын алды. Жедел әрекет еткен полицейлердің осы іс-әрекетінің нәтижесінде, автокөлік жүргізушісінің өміріне қауіп төнген жоқ. Артынша оқиға орнына өрт сөндіру қызметі де келді. Осылайша төтенше жағдайдың алдын алған Шымкент қаласы Полиция департаментінің қызметкерлеріне жүргізуші өз алғысын айтты.
Сондай-ақ, аталған жайт бойынша жергілікті тұрғындар бейнежазба арқылы тәртіп сақшыларына алғысын айтып, қызметтеріне табыс тілеп, Шымкент қаласы Полиция департаментінің ресми instagram @Police_Shymkent парақшасына жолдап отыр. Өрттің алдын алған қызметкерлердің кәсіби жұмыс сапасына да тәнті болып, риясыз ризашылығын жеткізді.
