Балаларға полиция жұмысы туралы қалай қызықты әңгімелеуге болады? Солтүстік Қазақстан облысы полиция департаментінің криминалистері бұл сұраққа нақты әрекетпен жауап берді – олар балаларды нағыз маман рөліне енгізіп, өз ісін көзбен көруге мүмкіндік берді, – деп хабарлайды Polisia.kz.
СҚО ПД жедел-криминалистикалық басқармасының қызметкерлері "Аққайың" лагеріне барып, оқушыларға жылжымалы криминалистикалық зертхананы көрсетті. Мамандар қылмыс орнын қарау, дәлелдерді анықтау және заттай айғақтарды алу үшін пайдаланылатын арнайы жабдықталған чемодандармен таныстырды.
Балалар арнайы құралдарды қолданып көріп, саусақ іздерін анықтауға арналған реактивтермен тәжірибе жасады. Криминалистер бұл саладағы ғылыми дәлдіктің күдіктінің кінәсін немесе кінәсіздігін анықтауда қандай рөл атқаратынын айтып берді.
Балалардың қызығушылығын қылмыскерлерден тәркіленген қару үлгілері де тудырды.
Жазғы демалыс кезеңінде СҚО ПД-ның барлық жетекші бөлім балалар лагерьлерінде құқықтық сауаттылықты арттыру, кәсіби бағдар беру және ең бастысы — "Заң және тәртіп" қағидатына құрметті қалыптастыру мақсатында белсенді профилактикалық жұмыс жүргізуде.
