СҚО-да полиция департаментінде ашық есік күні өтті, – деп хабарлайды Polisia.kz.
Қаңғыбас иттер шабуыл жасаса не істеу керек? Қоғамдық орындардағы қауіпсіздікті полицейлер қалай бақылайды? Құқық қорғау органдарының техникалық жабдықталуы қалай дамып келеді? Осы және басқа да сұрақтарға Петропавлдағы №4 мектептің 9-сынып оқушылары Солтүстік Қазақстан облысы полиция департаментінде өткен ашық есік күнінде жауап алды.
Оқушылар СҚО полиция департаментінің мұражайында болып, өңірдегі құқық қорғау органдарының тарихымен, қарақшылықпен қарсы күрестің күрделі кезеңдерімен, сондай-ақ солтүстік қазақстандық милиционерлердің Ұлы Отан және Ауған соғыстарындағы ерліктерімен танысты.
Экспозициялардың арасында қызметтік нарядтардың іс-қимылдарын үйлестіруге арналған алғашқы байланыс құралдары да бар. Бүгінде олардың орнын бейнебақылаудың ауқымды жүйесі мен көпарналы байланыс алмастырды. Азаматтар полицияға телефон, мобильді қосымша немесе "SOS" батырмасы арқылы хабарласа алады. Музейден кейін оқушылар жедел басқару орталығына барып, облыс орталығы мен аудандардың мыңдаған бейнекамераның бақылауында екенін өз көздерімен көрді.
Жоғары сынып оқушыларына ерекше әсер қалдырған бөлім – СҚО ПД кинологиялық қызмет орталығы болды. Мұнда мамандар қызметтік иттерді іріктеу және дайындау барысы туралы айтып, қауіпсіздік жөнінде пайдалы кеңестер берді.
Полицейлер оқушыларға қызметтік иттердің есірткі мен жарылғыш заттарды, тыйым салынған бұйымдарды іздеуге, із кесуге және шабуылдық дайындыққа қалай үйретілетінін көрсетті. Балалар иттерді үйрету тәсілдері мен кинологиялық қызметке қабылдау шарттары жөнінде сұрақтар қойды.
Заң мен тәртіпті қорғау қызметімен таныстыру – жастардың құқықтық мәдениетін арттыруға және полицияның ашық әрі сенімді бейнесін көрсетуге бағытталған.
