СҚО-да сотталғандарға 100-ден аса кітап сыйға берілді, — деп хабарлайды Polisia.kz.
Сотталған азаматшалардың бірінің анасы СҚО бойынша ҚАЖ департаментінің №50 мекеме кітапханасының қорын толықтыру мақсатында аса маңызды үлес қосты – ол кітапханаға 100-ден астам кітапты сыйға тартты. Сыйға берілген кітаптар қатарында көркем әдебиет, классика, публицистика, анықтамалық және білім беру бағытындағы материалдар бар. Бұл әрекет тек қызына көрсетілген қолдаудың белгісі ғана емес, сонымен қатар басқа сотталған азаматтардың білім алуына және рухани дамуына жол ашатын игі қадам болды.
Бүгінгі күні мекеме кітапханасының қоры түрлі тақырыптағы және жанрдағы 6,5 мыңнан астам кітапты қамтиды. Жаңа түскен кітаптар тек оқуға ғана емес, сонымен қатар білім алу мақсатында да қолданылатын болады – сабақтарға дайындалу, сауаттылықты арттыру және мәдени-ағартушылық іс-шараларға қатысу үшін пайдаланылмақ.
2021 жылдан бастап мекемеде “Элегия” әдеби клубы табысты жұмыс істеп келеді. Бұл клубқа оқуға және әдебиетке қызығушылық танытқан сотталған азаматтар мүше. Кездесулер барысында олар оқыған кітаптарын талқылайды, пікір алмасады, бір-біріне әдеби шығармаларды ұсынады, әдеби жанрларды зерттейді және мәтінмен жұмыс істеу дағдыларын дамытады. Осындай бастамалар арқылы кітап оқу бос уақытты өткізудің ғана емес, жеке дамудың, өзін танудың және қоғамға қайта бейімделудің құралына айналады.
Сыйға тартылған кітаптар кітапхана сөрелерінен лайықты орын алып, сотталған азаматтардың мәдени және интеллектуалдық дамуына үлес қоспақ.
