СҚО-да полицейлер мен жұртшылық өкілдері балалардың қауіпсіздігі мен жол қозғалысын ұйымдастыру мәселелерін талқылады, – деп хабарлайды Polisia.kz.
Жазғы демалыстың басталуына байланысты негізгі тақырып – өскелең ұрпақтың қауіпсіздігі болды. Петропавл қаласы полиция басқармасының бастығы Марат Жұмалиев жылдың алғашқы айларының қорытындысы бойынша кәмелетке толмағандар жасаған қылмыстар саны 10-нан 6-ға дейін азайғанын хабарлады. Сондай-ақ қолайсыз отбасылармен жүргізілетін жұмыс туралы айтты. Айта кету қажет, жыл басынан осындай отбасыларда тәрбиеленіп жатқан жасөспірімдер тарапынан бірде-бір қылмыс тіркелмеген. ККО мүшелері тәртіп сақшылары жүргізіп жатқан профилактикалық жұмыстарды талқылады және жасөспірімдермен интерактивті, эмоционалды жұмыстарды күшейтуді ұсынды.
Күн тәртібіндегі екінші маңызды мәселе – Петропавлдағы халық тығыз қоныстанған “Береке” ықшам ауданын қаланың орталығымен байланыстыратын көшелерде жол қозғалысын ұйымдастыру. Бұл тұрғыда СҚО ПД әкімшілік полиция басқармасының бастығы Серік Әлжанов баяндама жасады. Оның айтуынша, аталмыш аудандағы қарқынды жүргізіліп жатқан құрылыс жұмыстарына байланысты Әуезов пен Батыр Баян көшелерінде көлік қозғалысы бірнеше есе артқан. Талқылау қорытындысы бойынша ККО төрағасы Жасұлан Ахметов жергілікті атқарушы органдарға бірқатар көшелерде біржақты және екіжақты қозғалысты ұйымдастыру мәселесін қарастыру туралы ұсыныс жасады.
СҚО ПД бастығы Айдын Қабдұлдинов атап өткендей, консультативтік-кеңесші орган полиция мен қоғамның өзара іс-қимылының тиімді құралдарының бірі.
