СҚО полицейлері нашақорлыққа қарсы күрес бойынша жұмысты күшейтті, – деп хабарлайды Polisia.kz.
СҚО полицейлері нашақорыққа қарсы күресті күшейтті. «Есірткісіз болашақ» деген ұранмен Қызылжар ауданында оқушылар велосипедпен жүріп өтті. Қырыққа жуық велосипедші іс-шараға қатысып, өздерінің есірткіге қарсылықтарын білдірді.
– Айналамызда қызық дүниелер, спорттық ойындар көп. Ал есірткі – өмірге зиян келтіретін зор қауіп. Бұл туралы нақты фактілер көп көрсетіледі. Қорқынышты, – дейді велосипедші Руслан Клоков.
Барлық іс-шаралар 26 маусымда аталып өтетін Халықаралық нашақорлыққа және есірткінің заңсыз айналымына қарсы күрес күніне арналды. Полицейлер Психологиялық денсаулық орталығының қызметкерлерімен бірлесе өткізген «Темекіні кәмпите айырбаста» акциясы – салауатты өмір салтын насихаттауға бағытталды.
Темекісін кәмпитке айырбастағысы келген петропавлдықтар көп болды. Кейбіреуі жаман әдеттерден гөрі тәттілерді тәуір көретіндерін айтты.
– Осындай ерекше іс-шаралар арқылы жастарға ой салғымыз келеді. Осы ай бойы түрлі акциялар, спорттық ойындар өткізілетін болады. Басты мақсат – есірткіге қарсы иммунитетті қалыптастыру, салауатты өмір салтын ұстауға шақыру, – дейді СҚО ПД Есірткі қылмысына қарсы іс-қимыл басқармасының бастығы Жандос Басыбаев.
Солтүстік Қазақстан облысында жыл басынан заңсыз айналымнан 18 келі түрлі есірткі алынды, есірткі жарнамалайтын және тарататын 97 сайт анықталды.
