СҚО-да полиция жастарға құқықтық тәртіптің маңызын түсіндірді, - деп хабарлайды Polisia.kz.
Петропавл қаласы мен облыс аудандарындағы спорт секцияларының тәрбиеленушілерімен өткен кеңейтілген кездесу аясында полиция департаментінің басшылығы мен қызметкерлері құқықтық тәртіптің маңызы туралы айтты.
"Спорт және Заң – болашақты қалыптастыратын күш" атты шара "Заң және Тәртіп" идеологиясын нығайтуға бағытталды.
Кездесуге жүздеген жас спортшы, жаттықтырушылар және спорт жанашырлары қатысты. Олар СҚО әкімінің орынбасары Жүсіп Жұмағұловтың, облыстық прокуратура өкілдерінің, спорт ардагерлері мен әкімдік жетекшілерінің сөздерін тыңдады.
Полиция атынан департамент бастығының орынбасары Абылғазы Ғабдуллин баяндама жасап, жастардың қауіпсіздігі мен өңірде спортты дамыту мәселелері әрқашан назарда екенін айтты. Оның айтуынша, ішкі істер органдары қоғамдық тәртіпті қамтамасыз етуде алдыңғы шепте қызмет атқара отырып, ең басты міндет ретінде қылмыстың алдын алуға басымдық береді.
Сонымен бірге полицияның күнделікті патрульдік қызметінен бөлек, заманауи технологиялар да кеңінен қолданылуда. Қалалық және аудандық көшелердегі ахуалды тәулік бойы бейнебақылау камералары мен жасанды интеллект элементтері бар жүйелер бақылап отыр.
Полицияның жедел басқару орталығы 43 495 бейнекамерадан дерек алады. Соған қарамастан, құқық бұзушылықтар тіркелуде: жыл басынан бері 11 айда 258 құқық бұзушылық анықталған, олардың 200-ден астамы — облыс орталығында. Көпшілігі — ұрлық пен бұзақылық фактілері.
Абылғазы Ғабдуллин заңды білмеу жауапкершіліктен босатпайтынын ерекше атап өтті. Бұзақылық, денсаулыққа зиян келтіру, есірткі қылмыстары сияқты әрекеттер үшін жасына немесе әлеуметтік мәртебесіне қарамастан қылмыстық жауапкершілік қарастырылған.
Құқық қорғау органдарының кешенді жұмысы өңірде тыныштықты сақтау, қоғам мен жастардың қауіпсіз дамуына қажетті жағдай жасау бағытында үздіксіз жүргізіліп келеді.
