Түркістан полицейлері «STOP-трафик» жедел алдын алу іс-шарасы барысында жеңгетайлықтың 3 дерегін анықтады, – деп хабарлайды Polisia.kz.
«STOP-трафик» жедел алдын алу іс-шарасының қорытындысы туралы кезекті брифингте Түркістан облысы Полиция департаменті бастығының орынбасары Құрманбек Сахов айтып берді.
– 21-27 ақпан аралығында Түркістан облысының аумағында «STOP-трафик» жедел алдын алу іс-шарасы өткізілді. Жедел-іздестіру іс-шараларының қорытындысымен криминалдық полиция қызметкерлері ҚР ҚК 309-бабы (Жезөкшелiкпен айналысуға арналған притондар ұйымдастыру немесе оларды ұстау және жеңгетайлық) бойынша 3 деректі анықтады. Мәселен, Арыс қаласындағы жеке үйлердің бірінде интимдік қызмет көрсету күдігімен жеңіл жүрісті бойжеткен мен жеңгетай ұсталды. Қазіргі уақытта жеңгетайлық дерегі бойынша сотқа дейінгі тергеу амалдары жүргізілуде. Заттай дәлелдемелер алынды. Оқиғаның барлық мән-жайы анықталуда. Бұған дейін осыған ұқсас тағы екі қылмыс Сарыағаш ауданында анықталды. Мұнда екі қонақ үй әкімшісі мен үш жеңіл жүрісті қыз ұсталды. Аталған деректер бойынша сотқа дейінгі тергеу жүргізілуде. Сонымен қатар «STOP-трафик» жедел алдын алу шарасы аясында қоғамдық орындарда тиісу бойынша 19 дерек анықталып, ҚР ӘҚБтК-нің 449-бабымен (Қоғамдық орындарда тиісу) әкімшілік хаттама толтырылды. Барлығы 19 жеңіл жүрісті қыз профилактикалық есепке қойылды, – деп түйіндеді өз сөзін Қ.Сахов.
Естеріңізге сала кетейік, «STOP-трафик» жедел алдын алу іс-шарасының мақсаты – жеке адамға қарсы қылмыстарды анықтау, адамдарды жеңгетайлық пен саудалау, қанау мақсатында оларды ұрлау және бас бостандығынан айыру деректерінің жолын кесу, сондай-ақ өзге де құқық бұзушылықтарды анықтау.
Түркістан облысының полицейлері атап өткендей, мұндай алдын алу шаралары алдағы уақытта да жалғасын табатын болады.
