Табиғатты қорғау полициясының аға инспекторы Мұрат Құдайбергенов үшін әрбір іс – жай ғана ресми хаттама емес, үнсіз көмек сұрайтын тіршілік иелерінің өмірін сақтау жолындағы күрес. Бұл – жоғалып кету қаупі бар табиғатты сақтап қалуға бағытталған шынайы жанашырлықтың көрінісі. Ол туралы Polisia.kz сайтынан оқыңыздар.
Ол күн сайын бейнебақылау орнатылмаған, қақпан мен айла-шарғыға толы, қол жетпейтін аймақтарға рейдке шығып, аңшылардың ізін кеседі. Мұндай сапарлар – төзімділік пен қырағылықты, батылдықты қажет ететін сындарлы сәттер. Техника дәрменсіз жерлерде ол жаяу жол тартады, бұтаққа ілінген іздер мен табиғаттың үнсіз белгілерін өмірден алған тәжірибесімен оқиды.
Мұраттың қызметі тек кәсіби шеберлікпен шектелмейді – ол табиғатқа деген терең сүйіспеншілікті қажет етеді. Ол аңдардың мінез-құлқын біледі, иісті, ізді таниды, өзгелер байқамайтынды аңғарады. Асыл тұқымды киіктерді құтқарып, заң бұзушыларды тоқтатып, тұрғындарға түсіндіру жұмыстарын жүргізеді.
Жүздеген шақырымдарды жаяу жүріп, ондаған жануардың өмірін сақтап қалған, көптеген экологиялық заң бұзушылықтарды әшкерелеген ол – нағыз табиғат жанашыры.
– Әрбір жануар – жай ғана статистика емес, ол – тірі жан иесі. Біз көмектеспесек, кім көмектеседі? – дейді Мұрат.
Ол түсте – заңсыз жолмен алынған металл мен терілерді қабылдау орындарын, кешке – сирек ағаштарды кесу деректері бойынша орман ішін тексереді. Құқық бұзушылар – кездейсоқ білместерден бастап, ұйымдасқан браконьерлерге дейін әртүрлі. Олардың әрқайсысымен жұмыс істеу – үлкен жауапкершілік пен қауіпке толы.
Сабырлы болмысының ар жағында отанға, табиғатқа деген ыстық махаббат жатқан Мұраттың үйінде екі баласы мен жұбайы оны әрқашан құшақ жая қарсы алады. Белгісіз жұмыс кестесі мен түнгі қоңыраулар – олардың күнделікті өмірінің бір бөлігі. Бірақ Мұрат бұл қызметін табиғатты қорғау ғана емес, болашақ ұрпаққа аманат ретінде қабылдайды.
Ол – табиғатты қорғау жолында жан аямай еңбек етіп жүрген, үнсіз батыр.
