Талдықорған қалалық полиция басқармасында Жетісу облысы полиция департаментінің қызметкерлері қаладағы ойын-сауық мекемелерінің иелері мен әкімшілерінің қатысуымен жұмыс кеңесін өткізді, - деп хабарлайды Polisia.kz.
Жиынның негізгі өзегі - жаңа жыл мерекелері қарсаңында, демалыс индустриясына түсетін жүктеме дәстүрлі түрде артатын кезеңде, персонал мен келушілердің қауіпсіздігін қамтамасыз ету мәселелері болды.
Кездесу барысында мереке күндері жанжал жағдайларымен және түрлі тәуекелдермен алғашқылардың бірі болып бетпе-бет келетін күзетшілер мен даяшылардың қауіпсіздігін қорғауға ерекше назар аударылды. Қатысушылар төтенше жағдайларға ден қою тетіктерін, полициямен жедел өзара іс-қимыл жасау тәртібін, сондай-ақ құқық бұзушылықтардың алдын алу жолдарын жан-жақты талқылады.
Жиын қорытындысы бойынша мекеме әкімшіліктері мен полиция қызметкерлері арасында жедел ақпарат алмасуға арналған арнайы жұмыс чатын құру туралы шешім қабылданды. Бұл бастама ықтимал қауіп-қатерлер туралы мәліметті нақты уақыт режимінде жеткізуге, іс-қимылды жедел үйлестіруге және келеңсіз оқиғалардың алдын ерте кезеңде алуға мүмкіндік береді.
Сонымен қатар ұсынымдық сипатта күзетшілер мен даяшыларға бейнежетондарды енгізу ұсынылды. Бұл құрал орын алып жатқан жағдайларды тіркеуге, ашықтықты арттыруға және мекеме қызметкерлері мен келушілердің құқықтарын қорғауға қосымша мүмкіндік береді.
Тиімді өзара іс-қимылдың нақты үлгісін "Status" түнгі клубы көрсетіп отыр. Аталған мекеме әкімшілігі құқық қорғау органдарымен тығыз байланыс орнатып, қоғамдық қауіпсіздікті қамтамасыз етудің заманауи тәсілдерін сәтті енгізуде.
Мұндай кездесулер жауапты бизнес мәдениетін қалыптастыруға, сондай-ақ ең қарбалас мерекелік күндердің өзінде әрбір тұрғын өзін қауіпсіз сезіне алатын қауіпсіз қалалық орта құруға бағытталған маңызды қадам болып табылады.
