Талдықорғанда полицейлер ата-аналарға балалар қауіпсіздігі туралы түсіндіру жұмыстарын жүргізді

Талдықорғанда полицейлер ата-аналарға балалар қауіпсіздігі туралы түсіндіру жұмыстарын жүргізді, – деп хабарлайды Polisia.kz.

Ата-ана бала үшін – құндылықтар, мінез-құлық нормалары, жауапкершілік пен қауіпсіздік туралы түсінік қалыптасатын шағын "мемлекеттің" алғашқы жүйесі. Дәл отбасында адамгершілік негіздері мен қоршаған әлемге деген көзқарас қаланады.

Талдықорған қаласындағы №28 мектеп-лицейінде Жетісу облысы полиция департаментінің қоғамдық қауіпсіздік басқармасы қызметкерлері балалардың қауіпсіздігін қамтамасыз етуге және ата-аналардың жауапкершілігін арттыруға бағытталған ата-аналар жиналысын өткізді. Кездесу полиция мен ата-аналар арасындағы ашық әрі мазмұнды диалог алаңына айналды.

Жиналыс барысында құқық қорғау органдары өкілдері кәмелетке толмағандардың түнгі уақытта көшеде жүруінің қауіптілігі туралы еске салды. Сондай-ақ әлі қалыптасып үлгермеген баланың санасы қылмыстық әрекеттер үшін оңай олжаға айналуы мүмкін екеніне және жол қозғалысы ережелерін сақтамаудың тәуекелдеріне ерекше назар аударылды.

Полиция қызметкерлері балалардың қауіпсіз мінез-құлқын қалыптастыруда ата-аналардың шешуші рөл атқаратынын атап өтті. Бұл – жеке үлгі көрсету, тұрақты назар аудару және тәрбиеге жауапкершілікпен қарау арқылы жүзеге асады.

— Ешбір профилактикалық рейд ата-аналық бақылаудың орнын алмастыра алмайды. Баланың қауіпсіздігі үйден басталады — сенімнен, қарым-қатынастан және ересектердің жеке үлгісінен, — деді қоғамдық қауіпсіздік басқармасының өкілдері.

Кездесу соңында ата-аналарға балалардың қауіпсіздігіне қамқорлық жасау бір реттік шара емес, күнделікті атқарылатын жұмыс екені ескертілді. Бұл жолда назар, белсенді қатысу және жауапкершілік аса маңызды. Өйткені өскелең ұрпақ үшін басты бағдар мен қорған — әрдайым ата-ана.