Талдықорғанда полицейлер оқушыларға қауіпсіздік туралы дәріс өткізді, - деп хабарлайды Polisia.kz.
Талдықорған қаласындағы №6 мектепте полиция қызметкерлері 6-7 сынып оқушыларына профилактикалық дәріс өткізді. Кездесудің негізгі тақырыбы – буллинг пен кибербуллингтің жол берілмейтіндігі және олардың құқықтық салдары болды.
Полицейлер оқушыларға интернетте өзін дұрыс ұстаудың маңыздылығын түсіндіріп, желідегі кез келген агрессия заң бойынша қатаң жазаланатынын ескертті. Сондай-ақ құқық бұзушылық үшін жауапкершілік пен цифрлық ортадағы сыйластық қарым-қатынастың маңыздылығы ерекше атап өтілді.
Бұдан бөлек, мектеп оқушыларына жол қозғалысы ережелері, соның ішінде мопедтерді пайдалану бойынша заңнамадағы өзгерістер туралы ақпарат берілді. Жасөспірімдерге кешкі уақытта үлкендердің қарауынсыз көшеде жүрудің қауіпті екені түсіндіріліп, бұл талаптардың олардың қауіпсіздігін қамтамасыз етуге бағытталғаны айтылды.
Кездесу барысында полиция қызметкерлері жақсы білім алып, өз болашағына жауапкершілікпен қараудың табысты өмірдің кепілі екенін атап өтті. Мұндай кездесулер оқушыларға заңды сақтау мен жеке қауіпсіздіктің маңыздылығын түсінуге көмектеседі.
Сондай-ақ полицейлер ата-аналар мен интернет қолданушыларын күдікті жағдайларға және балалардың мінез-құлқындағы өзгерістерге бей-жай қарамауға шақырды. Дер кезінде әрекет ету күрделі салдардың алдын алуға мүмкіндік береді.
Осындай бастамалар әр азаматтың қауіпсіздігі мен әл-ауқатына мән беретін жауапты қоғам қалыптастыруға ықпал етеді.