Құқық бұзушылықтың алдын алу – полиция қызметінің ең маңызды бағыттарының бірі. Талдықорған қаласында учаскелік полиция инспекторлары азаматтармен жүйелі профилактикалық жұмыс жүргізіп, құқыққа қарсы әрекеттердің қайталануына жол бермеуге күш салып келеді, - деп хабарлайды Polisia.kz.
Құқық бұзушылықтың алдын алу – полиция қызметкерлерінен тек жоғары кәсібилікті ғана емес, сонымен қатар зор төзімділікті, сабыр мен адамгершілікті талап ететін үздіксіз әрі жауапты жұмыс. Оның басты мақсаты – азаматтарды қайта тәрбиелеу, өмірге деген көзқарасын өзгерту және заңға бағынатын, тәртіпті өмір салтына бағыттау.
Бұл міндетті күн сайын учаскелік полиция инспекторлары атқарады. Қызметтік міндетіне сәйкес олар түрлі өмірлік жағдайлармен, кейде күрделі адам тағдырларымен бетпе-бет келеді. Олардың жұмысы құқық бұзушылыққа жауап қатумен ғана шектелмейді. Көп жағдайда бұл – психологиялық қолдау көрсету, әлеуметтік көмекке бағыттау және алдын алу шараларын жүйелі түрде жүргізу.
Полиция деректеріне сәйкес, Талдықорған қаласында профилактикалық есепте 1660 адам тұр. Олардың 883-і алкогольдік ішімдіктерді шамадан тыс пайдаланатын тұлғалар ретінде, ал 123-і есірткі заттарын қолданатын азаматтар ретінде тіркелген. Бұл көрсеткіштер алдын алу жұмыстарының ауқымын және есепте тұрған әрбір адамға жеке көзқарастың қаншалықты маңызды екенін айқын аңғартады.
Мәселен, бүгін Талдықорған қаласының полиция қызметкерлері бұзақылық дерегі бойынша түскен шақыртуға жедел әрекет етті. Оқиға орнына барған полицейлер белгіленген тәртіпке сәйкес ер адамның алкогольдік және есірткілік масаң күйде болуын тексерді. Кейін медицина қызметкерлерінің қатысуымен профилактика кабинетінде арнайы түсіндіру әңгімесі жүргізілді. Әңгімелесу барысында полиция қызметкерлері заң талаптарын түсіндірумен қатар, психолог ретінде де әрекет етіп, құқыққа қарсы іс-әрекеттердің салдарын және қоғамдық тәртіпті сақтаудың маңызын жеткізуге тырысты.
Алдын ала нәтижелерге сәйкес, жүргізілген профилактикалық әңгіме оң әсерін тигізген. Алайда жұмыс мұнымен аяқталмайды. Аталған азамат алдағы уақытта да учаскелік полиция инспекторларының бақылауында болады. Себебі құқық қорғау органдарының басты мақсаты – жазалау емес, құқық бұзушылықтың қайталануына жол бермеу.
Полиция қызметкерлерінің еңбегі – қоғам игілігі жолындағы күнделікті қызмет. Ол жанқиярлықты, зор төзімділікті және жоғары жауапкершілікті талап етеді. Көбіне жеке уақытын құрбан ете отырып, олар азаматтардың қауіпсіздігі мен тыныштығын қамтамасыз етуге күш салады. Осындай жүйелі әрі мақсатты профилактикалық жұмыс қоғамда заңға деген құрметті қалыптастырып, қоғамдық тәртіпті нығайтуға мүмкіндік береді.
