Талдықорғанда жасөспірімдер арасындағы құқық бұзушылық пен суицидтің алдын алу мәселелері талқыланды, – деп хабарлайды Polisia.kz.
Талдықорғанда полиция қызметкерлерінің және прокуратурасының бастамасымен Жетісу облысы Қазақстан халқы Ассамблеясы өкілдерінің, ата-аналар мен кәмелетке толмағандардың қатысуымен дөңгелек үстел өтті.
Кездесу барысында жасөспірімдер арасындағы құқық бұзушылықтың, суицидтік мінез-құлықтың алдын алу, сондай-ақ кәмелетке толмағандарда құқықтық мәдениет пен жауапкершілік сезімін қалыптастыру мәселелері талқыланды.
Іс-шара ашық диалог форматында өтті, бұл қатысушыларға еркін пікір алмасуға және мамандарға өздерін толғандырған сұрақтарын қоюға мүмкіндік берді. Құқық қорғау органдарының өкілдері қолданыстағы заңнама нормаларын, құқыққа қайшы әрекеттер үшін көзделген жауапкершілік шараларын түсіндіріп, құқық бұзушылықтардың салдарына — жасөспірімдердің өздері мен олардың отбасылары үшін тигізетін әсеріне назар аударды.
Сондай-ақ девианттық және суицидтік мінез-құлық белгілерін ерте анықтаудың маңыздылығына ерекше назар аударылды. Қатысушыларға алаңдататын белгілерді дер кезінде қалай байқауға болатыны және қайда көмекке жүгіну керектігі жөнінде тәжірибелік ұсыныстар берілді.
Талқылау барысында отбасының, білім беру ұйымдарының және қоғамдық бірлестіктердің балалар үшін қауіпсіз орта қалыптастырудағы, олардың құқықтары мен мүдделерін қорғаудағы, сондай-ақ жағымсыз әлеуметтік құбылыстардың алдын алудағы рөліне айрықша мән берілді.
Кездесу қорытындысы бойынша қатысушылар мұндай іс-шаралардың мемлекеттік органдар, қоғам және отбасы арасындағы өзара іс-қимылды нығайтудағы маңызын атап өтіп, өсіп келе жатқан ұрпақтың қауіпсіздігі мен әл-ауқатын тиімді қамтамасыз ету тек бірлескен күш-жігер арқылы ғана мүмкін екенін атап өтті.
