Талдықорғанда жастар арасында есірткіге қарсы профилактикалық кездесу өтті, - деп хабарлайды Polisia.kz.
Талдықорған қаласындағы Жақсылық Үшкемпіров атындағы облыстық мамандандырылған олимпиадалық резерв мектеп-интернат-колледжі базасында Жетісу облысы полиция департаменті есірткі қылмысына қарсы іс-қимыл басқармасының қызметкерлері есірткі құқық бұзушылықтарының алдын алу кеңесімен және кинологиялық қызмет орталығының мамандарымен бірлесіп ауқымды профилактикалық кездесу өткізді.
Іс-шараға 140 оқушы мен студент - болашақ чемпиондар қатысты. Оларға тәртіп пен рух күші табыстың басты кепілі ретінде ұсынылды.
Кездесу жастар арасында есірткіге қарсы сананы қалыптастыруға, құқықтық сауаттылықты арттыруға және салауатты өмір салтын насихаттауға бағытталды. Құқық қорғау органдарының өкілдері қолданыстағы заңнама талаптарын жан-жақты түсіндіріп, тыйым салынған заттарды сақтау, тарату және пайдалану үшін қылмыстық жауапкершілік қарастырылғанын еске салды. Тіпті бір реттік қолданудың өзі ауыр құқықтық және өмірлік салдарға әкелуі мүмкін екені ерекше атап өтілді.
Кездесудің практикалық бөлімі қатысушылардың зор қызығушылығын тудырды. Кинологиялық қызмет орталығының мамандары қызметтік иттердің жұмысын көрсетіп, олардың есірткі заттарының оқу-жаттығу макеттерін сенімді түрде анықтайтынын паш етті. Бұл - құқық қорғау жүйесінің жүйелі әрі дәйекті жұмыс істейтініне нақты дәлел болды.
Студенттер белсенділік танытып, көкейлеріндегі сұрақтарын қойып, өмірлік жағдайларды талқылады, мамандардан кәсіби түсініктемелер алды. Ашық әрі мазмұнды диалог өрбіді.
