“Таза Қазақстан” республикалық жобасы аясында Жетісу облысында полицейлер, қоғам белсенділері және бейжай қарамайтын тұрғындар өңірдің тазалығы мен экологиялық қауіпсіздігі үшін бірігіп жұмыс істеуде, — деп хабарлайды Polisia.kz.
Бірлескен күш-жігердің нәтижесінде жол бойындағы аумақтар тазартылып, заңсыз қоқыс орындары жойылып, қала мен ауылдардың келбеті айтарлықтай жақсарды.
Алайда табиғатты қорғау бағытында жүргізіліп жатқан белсенді жұмыстарға қарамастан, қоршаған ортаға зиян келтіріп, ереже бұзатын азаматтар да кездеседі. Мұндай құқық бұзушылықтар назардан тыс қалмайды: полиция қоршаған ортаға қатысты жағдайды ұдайы бақылап отырады, бейнебақылау камералары мен белсенді блогерлердің көмегімен заң бұзушыларды анықтап, оларды қолданыстағы заңнамаға сәйкес жауапқа тартады.
“Бүгінгі тазалық – келешек ұрпақтың таза ортасы”, – деп атап өтті полиция өкілдері, әрбір азаматты экологиялық мәселелерге бейжай қарамауға шақырды. Тек бірлескен әрекет арқылы ғана Қазақстанның табиғи байлығын сақтап, болашақ ұрпаққа лайықты өмір қалдыруға болады.
