29 қарашада Астана қаласы бойынша адам құқықтары жөніндегі өкіл Баян Жалмағамбетова №64 тергеу изоляторының басшылығымен және қала прокуратурасының өкілдерімен бірге тергеуде отырған азаматтарды қабылдап, режимдік корпустардағы ұстау жағдайларына мониторинг жүргізді, – деп хабарлайды Polisia.kz.
Бұл жиынның басты мақсаты – адам құқықтарының сақталуын бақылау, ұстау жағдайларын жақсарту және тергеуде отырған азаматтардың заңгерлік көмек алуын қамтамасыз ету болды. Сонымен қатар сапар аясында медициналық қызмет көрсету және тұру жағдайларына қатысты өзекті мәселелер талқыланды.
Сапар барысында Баян Өмірзаққызы мен тергеу изоляторының бастығы Санат Рамазанов режимдік корпустардағы, соның ішінде әйелдерге арналған корпустардағы жағдаймен танысты. Ерекше назар әйелдердің қауіпсіздігін қамтамасыз етуге, олардың медициналық қызмет алу және әлеуметтік оңалту құқықтарын сақтауға аударылды.
Зорлық-зомбылыққа қарсы акция аясындағы құқықтық сағат
Шара барысында зорлық-зомбылыққа қарсы акция аясында құқықтық сағат өткізілді. Бұл құқықтық сағат азаматтардың құқықтары туралы хабардарлығын арттыруға, сондай-ақ зорлық-зомбылықтан қорғану мәселелері бойынша кеңес алуға мүмкіндік берді. Шара барысында әйелдерге, балаларға және бас бостандығынан айыру орындарындағыларға қатысты зорлық-зомбылықтың алдын алу мәселелері талқыланды. Сонымен қатар тергеуде отырғандардың құқықтық сауаттылығын арттыру қажеттілігі сөз болды, бұл олардың құқықтық нормаларды жақсырақ түсінуіне және бейімделуіне ықпал етеді.
Бұдан бөлек, шара барысында изоляторларда отырған адамдардың құқықтарын қорғау, оларға медициналық қызметтер мен заңгерлік көмек көрсетудің маңыздылығы айтылды. Алдағы уақытта ұстау жағдайларын жақсарту және Астана қаласындағы тергеу изоляторларында құқық қорғау қызметін күшейтуге бағытталған қосымша шаралар әзірленетін болады.
