Төлеби ауданындағы демалыс орындарына блок-бекеттер қойылып, 2500-ге тарта көлік кері қайтарылды, – деп хабарлайды Polisia.kz.
Баршаңызға белгілі табиғаты әсем Төлеби ауданында демалыс орындары көп. Алайда қазіргі таңда елімізде карантин енгізілгендіктен адамдар тобының шоғырлануына жол жоқ. Осыған орай Төлеби аудандық Бас мемлекеттік санитарлық дәрігерінің 22 шілде 2020 жылғы №24 қаулысы шықты.
Қаулыға сәйкес, 2020 жылдың 24-26 шілде күндері аралығында Төлеби ауданы Біркөлік, Қасқасу тау шатқалдарында орналасқан демалыс орындарына баратын жолдарға блок-бекеттер қойылды. Бұл блок-бекеттер санитарлық нормалардың бұзылуына жол бермеу, демалыс орнына келушілерді қайтарып, карантин талаптарын сақтауды қамтамасыз ету мақсатында қойылған.
Блок-бекеттердегі қызметкерлер барынша түсіндіру жұмыстарын жүргізді. Яғни демалыс орындарына келушілерге Бас санитарлық дәрігердің қаулысы таныстырылып, жалпы 2500-ге жуық автокөліктер кері қайтарылды. Нақтырақ айтсақ, демалуға келуші адамдардың көбісі Шымкент қаласының тұрғындары екендігі анықталды. Сонымен қатар, жұмыс істеп тұрған 17 демалыс орындарына іс-құжаттар жинақталып, ҚР ӘҚБтК-нің 425-бабы «Халықтың санитарлық-эпидемиологиялық салауаттылығы саласындағы заңнама талаптарының, сондай-ақ гигиеналық нормативтердің бұзылуы» бойынша хатттама толтырылды.
Сондай-ақ су жағалауында шомылып жүрген, қауіпсіздік шараларын сақтамаған 37 тұрғынға ҚР ӘҚБтК-нің 364-бабымен «Жалпы су пайдалану ережелерін бұзу« әкімшілік хаттама толтырылып, ескерту жасалынды.
Одан бөлек, билік өкілін қорлаған тұрғындарға шара қолданылды. Мысалы, 26 шілде карантин талаптарының сақталуы барысында қойылған Біркөлік ауылына кіреберіс жердегі блок-бекетте полицейлер «Toyota» маркалы автокөлікті тоқтатып, түсіндіру жұмыстарын жүргізген. Алайда көлік ішіндегі екі жігіт тәртіп сақшыларын тыңдағысы, бағынғысы келмей, полиция қызметкерлерін балағаттап, қарсылық көрсеткен. Аталған жайтқа байланысты ҚР ҚК-нің 378-бабымен «Билік өкілін қорлау« қылмыстық іс қозғалды. Тәртіп бұзушылардың бас шарасы міндеттемемен босатылды.
Карантин режимінің сақталуы бағытындағы жұмыстар төлебилік полицейлер тарапынан алдағы уақытта да өз жалғасын таба бермек.
