Түркістан облысында бірнеше ұрлыққа қатысы бар ер адам ұсталды, – деп хабарлайды Polisia.kz
Ордабасы аудандық полиция бөліміне екі бірдей жергілікті тұрғын арызданды. Жәбірленуші ер адамның айтуынша, оның тұрғын үйінің ошақханасынан бұрғылау, ағаш сүргілеу және ағаш кесетін құралдарын белгісіз біреу ұрлап кеткен. Жәбірленушіге жалпы келтірілген шығын көлемі – 245 мың теңге. Ал екінші жәбірленуші әйелдің айтуынша, белгісіз біреу оның алтын жүзігі пен сырғасын, банк карточкасын жасырын түрде жымқырып кеткен. Келтірілген шығын көлемі – 317 мың теңге.
Аталған жайтты полиция қызметкерлері ҚР ҚК-нің 188-бабы (Ұрлық) бойынша тіркеуге алды.
Хабарлама келіп түскен бойда тәртіп сақшылары бірден іске кірісті. Олар қылмысты ашу үшін қажетті шаралардың барлығын жүзеге асырды. Көрген-білгендерден сұрастыру жұмыстарын жүргізді. Тәртіп сақшыларының жедел-іздестіру жұмыстарының нәтижесінде күдікті анықталды. Ол жергілікті тұрғын болып шықты.
Анықталғандай, күдікті ер адам жәбірленушінің танысы екендігі белгілі болды. Ол екі жәбірленушінің үйінен жымқырған заттарды сатып, ақшасын жаратып жіберген. Қазіргі таңда күдікті қамауға алынып, тергеу амалдары жүргізілуде.
