Түркістан облысы полиция департаментінің бастамасымен Сайрам ауданында кезекті “Жас сақшы” полиция сыныбы ашылды, – деп хабарлайды Polisia.kz.
Жастарды отансүйгіштікке тәрбиелеу және ел тыныштығын сақтауға баулу мақсатында ашылған бұл сыныпқа аудандық полиция басқармасының бұрынғы бастығы, құрметті азамат, полиция полковнигі Мәлік Оразалиевтің есімі берілді.
Салтанатты шараға аудан әкімінің орынбасары Сержан Дүйсебаев, полиция департаментінің өкілі Ерлан Шамшат, Ішкі істер органдары және Ұлттық ұлан ардагерлер кеңесінің төрағасы Оспанғазы Жанқожаев, полиция басқармасының бастығы Мұрат Ермеков, ардагерлер кеңесінің төрағасы Данышпан Андасбеков және марқұм Мәлік Оразалиевтің ұл-қыздары қатысты.
Сыныптың ашылу мақсаты – қазақстандық полицияның беделін арттыру, батылдықты насихаттау және оқушыларды патриоттық рухта тәрбиелеу. Шара барысында Оспанғазы Жанқожаев жастарға қолдау білдіріп, сыныпқа есімі берілген Мәлік Оразалиев туралы жүрекжарды естеліктерімен бөлісті.
Жиын соңында полиция сыныбының 30 оқушысы өз Отанын қорғауға, оқуда озат болуға және қоғамдық өмірде белсенділік танытуға ант беріп, "Жас сақшы" қатарына қабылданды.
Айта кетейік, бұл сынып — облыста ашылған он алтыншы полиция сыныбы.
