Түркістан облысында полиция есірткі қойып кетушілерден 2,5 келіге жуық мефедрон тәркіледі, – деп хабарлайды Polisia.kz.
Түркістан облысының полиция департаменті есірткі қылмысына қарсы іс-қимыл басқармасының қызметкерлері жедел-профилактикалық іс-шараларды өткізу барысында, синтетикалық есірткі мен психотроптық заттарды заңсыз сақтау және өткізу фактілерін анықтады.
Мәселен, полиция қызметкерлері Қазығұрт ауданындағы жедел-іздестіру шаралары нәтижесінде Шымкент қаласының тұрғынын ұстап, одан ішінде есірткіге ұқсас ұнтақ заты бар екі полиэтилен пакетті тапты.
Сондай-ақ жедел уәкілдер Шымкент қаласындағы екінші күдіктінің жалдамалы пәтерін тінту кезінде 1,5 келі «синтетикалық есірткі» тауып, тәркіледі. Жалпы алынған есірткі затының салмағы 2,5 келіге жуық мефедрон, яғни 5 мың дозаны құрады.
Күдіктілердің Шымкент қаласы мен Түркістан облысының аумағында қойып кету арқылы «синтетика» есірткісін таратумен айналысқаны анықталды. Екі күдікті де уақытша ұстау изоляторына қамауға алынды.
Сонымен қатар полиция қызметкерлері Шардара – Арыс тас жолындағы жедел-іздестіру жұмыстары кезінде Niva автокөлігін тоқтатты. Көліктің салонынан 500 дана «Трамадол» таблеткасы тәркіленді.
Қазіргі таңда анықталған деректер бойынша тергеу жүргізілуде.
