Түркістан облысында полиция есірткіні жарнамалайтын 300-ден астам сайтты бұғаттады, – деп хабарлайды Polisia.kz.
Түркістан облыстық әкімдігінде нашақорлыққа және есірткі бизнесіне қарсы іс-қимылға бағытталған жиын өтті. Облыс әкімінің орынбасары Б.Тәжібаев төрағалық еткен шараға Түркістан облысы ПД бастығының бірінші орынбасары Қ.Сахов, әкімдіктің мемлекеттік-құқықтық бөлімінің бас инспекторы Л.Бекеева, өңірлік ведомствоаралық штаб отырысының мүшелері, аудан әкімдігінің қызметкерлері мен жеке құрам қатысты.
Күн тәртібінде кәмелетке толмағандар арасында темекі мен ішімдік қолдану, есірткіге тәуелділікке қарсы профилактикалық шаралар, лицензиясыз прекурсорларымен жұмыс атқаратын тұлғаларды анықтау, талдау жүргізу, есірткі жарнамалайтын жазбаларды анықтау, жолын кесу бойынша атқарылған жұмыстар сараланып, талқыланды.
Облыстық қоғамдық даму, денсаулық сақтау басқармасы, полиция департаменті мен экономикалық тергеп тексеру департаменті басшылығы баяндама жасады.
Жиналғандар есірткіге қарсы иммунитетті қалыптастыру, денсаулығы мықты, дамыған ел атану жолында бірлесіп жұмыс жасауға уағдаласты. Қатысушыларға нашақорлық пен есірткі бизнесіне қарсы кешенді жоспарды жүйелі іске асыру бойынша тапсырмалар берілді.
Айта кетсек, облыста 2025 жылдың 3 айында есірткінің заңсыз айналымына қатысты 114 дерек тіркелді. Оның ішінде есірткі сатудың 13 дерегі, аса ірі көлемде есірткі сақтаудың 8 жайты, есірткі зертханасы бойынша екі дерек, есірткі өсімдіктерін өсірудің екі дерегі бар. Заңсыз айналымнан 120 келіден астам есірткі тәркіленсе, есірткіні жарнамалаған 305 ақпараттық сайт бұғатталды.
