Ордабасы ауданының 50 мыңнан астам тұрғыны бар Шұбарсу ауылында полицияның жаңа ғимараты ашылды, – деп хабарлайды Polisia.kz.
Салтанатты шараға Түркістан облысының әкімі Н.Көшеров, полиция департаментінің бастығы М.Қабденов пен аудан әкімдігінің басшылығы, ауыл ақсақалдары қатысты.
2 қабаттан тұратын учаскелік полиция пункті соңғы үлгідегі компьютерлік техникалармен және жиһаздармен толықтай жабдықталған. Аталған нысанда бейнебақылау жүйесі тартылған. Келген тұрғындар мен полицейлердің өз жұмыстарын алаңсыз жасауы үшін барлық жағдай жасалған. Яғни кезекші бөлім, уақытша ұстау изоляторы мен 16 қызметтік бөлме, мәжіліс залы, балаларға арналған бөлме қарастырылған.
- Бұның барлығы тәртіп сақшыларының жұмысты одан әрі жандандыруы үшін жасалып жатқан шара. Сондай-ақ халықтың құқық қорғау органына деген сенімін арттыру. Азаматтар полиция ғимаратына келіп өзінің маңызды сұрақтарына жауап алып, тығыз жұмыс істей алады. Алдағы қызметтеріңізге сәттілік! Жаңа ғимараттарыңыз құтты болсын, - деп атап өтті облыс әкімі Н.Көшеров.
Департамент бастығы М.Қабденов пен облыс әкімі бастаған құрметті қонақтар жаңа ғимаратты аралап, саптық алаңда болды. Мұндағы полицейлердің қызметтік қажеттіліктері толық қамтылғандықтан, жұмысты жүйелі жүргізу тапсырылды.
