Түркістанда жастарға криминалистиканың қыр-сыры туралы айтылды, – деп хабарлайды Polisia.kz.
ҚР ІІМ жедел-криминалистикалық департаментінің бастамасымен ҚР ІІМ М.Есболатов атындағы Алматы академиясы мен Түркістан облысы ПД-ның қызметкерлері бірлесіп маңызды іс-шара өткізді. Негізгі мақсат – полицияның жастармен тығыз ынтымақтастығы мен серіктестігін орнату арқылы құқық бұзушылықтардың алдын алу және қоғамдық қауіпсіздікті қамтамасыз ету.
Бұл іс-шараға Түркістан облысының жастары қатысты. 35 жас тұрғынға тәртіп сақшыларының күнделікті атқаратын жұмысы көрсетілді. Атап айтқанда, тергеу және жедел-криминалистикалық басқармаларының қызметкерлері “Қасақана кісі өлтіру дерегі бойынша оқиға орнын қарап тексеру кезінде криминалистикалық қамтамасыз ету” тақырыбы аясында практикалық оқу сабағын өткізді. Сондай-ақ Түркістан жастарына қазіргі еліміздің заманауи криминалистиканың қыр-сыры түсіндіріліп, криминалистикалық техникалар мен құрал-жабдықтар толықтай көрсетіліп, таныстырылды.
Іс-шара соңында жиналған жастарға ҚР ІІМ жоғарғы оқу орындарынан келген мамандар оқуға түсу ережелерін түсіндіріп, кәсіптік бағдар беру жұмыстарын жүргізді.
Шараға қатысқан жастар полиция қызметкерлеріне жылы лебіздерін білдіріп, алғыстарын жеткізді.
