Түркістандық полицейлер 11,5 млн теңгенің балығын аулаған браконьерлер тобын ұстады, – деп хабарлайды Polisia.kz.
Түркістан облысы ПД Криминалдық полиция қызметкерлері арнайы операция жүргізу нәтижесінде облыстың үш ауданының аумағында балық ресурстарын заңсыз өндірумен айналысқан күдіктілердің жолын кесті. Бұл туралы брифингте Түркістан облысы ПД бастығының орынбасары Құрманбек Сахов жеткізді.
– Түркістан облысы ПД Криминалдық полиция басқармасы мен Жылдам қимылдайтын арнайы жасақ қызметкерлері бірлесіп, Түркістан облысының жеті тұрғынынан тұратын алдын ала сөз байласу арқылы қылмыс жасаған адамдар тобын ұстадық, олардың бірі бұрын сотталған. Күдіктілер балық аулауға қажетті барлық құрал-жабдықтармен жабдықталған, яғни қайықтар, костюмдер, электр қондырғыларын қолдана отырып, табиғи ресурстарды өндіруді табыс көзіне айналдырған. Белгілі болғандай, браконьерлер түнгі уақытта Шардара және Көксарай су қоймаларында табиғат қорғау инспекторларының жоқ сәтін біліп, заңсыз балық аулаған. Содан кейін олар екі автокөлікпен заңсыз ауланған балықтарды Шымкент қаласының базарларына апарып сатқан. Ақшасын өзара бөлісіп отырған. Қазіргі уақытта алдын ала сөз байласып, қылмыс жасағандардың заңсыз балық аулаудың үш жайтына қатыстылығы дәлелденді. Ал келтірілген шығын көлемі 11,5 млн теңгеден асады. Күдіктілердің тұрғылықты жерін тінту кезінде екі автокөлік, үш қайық, төрт қайық қозғалтқышы, 10 қармақ, алты балық аулау костюмі, екі радиостанция және басқа да балық аулау құралдары, сондай-ақ 120-дан астам балық аулау торлары мен 1,5 тоннадан астам заңсыз ауланған балық тәркіледік. Бүгінде үш күдіктіні қамауға алдық, топтың қалған мүшелеріне қатысты «ешқайда кетпеу туралы қолхат» түрінде бұлтартпау шарасы таңдалды. Тергеуді ҚР ҚК-нің 335-бабы (Балық ресурстарын, басқа су жануарларын немесе өсімдіктерін заңсыз өндіру) бойынша жүргізудеміз. Оқиғаның барлық мән-жайы анықталуда, – деп түйіндеді Қ. Сахов.
