Тұрмыстық зорлық-зомбылықпен күрес инспекторы бір күнімен бөлісті, — деп хабарлайды Polisia.kz.
Полиция қызметінде жай күн деген болмайды. Әсіресе қоғамдағы ең әлсіз әрі ең ауыр мәселелердің бірі – тұрмыстық жанжалдармен бетпе-бет келетін инспекторлар мұны айқын сезінеді.
Полиция лейтенанты Кенжебаева Камила Амантайқызы қалалық полиция басқармасында қызмет етіп жүргеніне небәрі бір жыл болды. Қысқа уақыт ішінде ол мамандығының қиындығын да, шынайы қырын да таныды: көп жағдайда жұрт ашық айтпайтын, тек шыдамы таусылғанда ғана полицияға жүгінетін жайттармен бетпе-бет келді.
Жыл басынан бері полицияның профилактикалық есебіне тұрмыстық жанжалдарға қатысы бар 1720 азамат алынды. Жәбірленушілерге қатысты қорғау нұсқамалары шығарылып, олардың қауіпсіздігі қамтамасыз етілді. Ал сот шешімімен 178 азаматтың мінез-құлқына ерекше талаптар қойылды, соның ішінде ең көп тарағаны – алкогольді ішімдіктерді тұтынуға тыйым салу.
Қалада қазіргі таңда 53 тұрмысы қолайсыз отбасы бар, олардың ішінде ерекше қамқорлық пен қолдауды қажет ететін балалар өсіп келеді. Осындай отбасыларға полиция қызметкерлері барынша уақыт бөліп, алдын алу шараларын жүргізеді.
Бұл – тек жұмыс емес, адам тағдырлары. Сондықтан да Камила Кенжебаева бұл қызметке жүрек қалауымен келген.
— Мен бала күнімнен адамдарға көмектесуді армандадым. Басты мақсатымыз – құқық бұзушылықты тіркеу ғана емес, ең алдымен тыңдау, түсіну, қолдау көрсету. Әр кездесу – біреудің өмірін жақсы жаққа өзгерту мүмкіндігі, – дейді Камила Кенжебаева.
Оның әр күні осылай өтеді: көмек пен қорғаныш іздеген адамдармен сөйлесіп, олардың сенімін ақтауға тырысады. Бұл жұмыста көзге көрінбейтін еңбек көп, бірақ дәл осы еңбектің арқасында полицияға деген сенім артады, ал адамдар өзін жалғыз сезінбейді.
