Абай облысында учаскелік полицей қызметінің қыр-сырымен бөлісті, — деп хабарлайды Polisia.kz.
Учаскелік полиция инспекторлары Ішкі істер органдарының ауыр жүгін арқалаған қара нары секілді. Қоқыс пен темекі тұқылын кез келген жерге тастап кететін көршілердің айқай-шуынан бастап, кісі өліміне дейінгі ауыр қылмыстардың қақ ортасында жүретін олар – әмбебап мамандар. Өйткені өзі жауапты аумақта қылмыс тіркелсе, бірінші болып жететін ол криминалист, жедел уәкіл, тергеуші, анықтаушы сияқты жауапты мамандықтардың бүкіл міндетін қатар атқарып жүреді. Семей қаласындағы әмбебап учаскелік полиция инспекторларының бірі Кураков Руслан Болатович.
Бастапқыда саяжай кооперативі ретінде пайда болған Бобровка қазіргі уақытта 8682-ден астам тұрғыны бар өте үлкен ауыл, ал көшелерде 5489-ға жуық саяжай үйлері бар.
Осы аумақта 2008 жылдан бері қызмет ететін полиция майоры Руслан Кураков 10 мыңға жуық халықтың барлығын дерлік таниды. Күні-түні өз учаскелік аумағының тыныштығын сақтау үшін жан аянбай қызмет етуде.
— Бүгінде учаскелік инспекторлар үшін оңтайлы жағдайлар жасалған, полиция пункті жабдықталған, автокөлік, бейнежетондар және электрондық планшеттер бар. Бұл әрине, жұмыс жасауға өте ыңғайлы, — дейді полиция қызметкері.
Руслан құқық бұзушылықтардың алдын алу мақсатында есептегі тұлғаларды үнемі тексеріп отырады. Отбасылық-тұрмыстық құқық бұзушылықтарға бейім отбасыларды жүйелі бақылайды, олармен телефон арқылы хабарласып, кәмелетке толмаған балаларының жай-күйін тексереді.
