28 наурыз бен 3 сәуір аралығында ерлер арасындағы Қазақстан Республикасының жекпе-жек чемпионаты өтті, – деп хабарлайды Polisia.kz.
Алматы қаласында ұйымдастырылған сайысқа ҚР ІІМ Ұлттық ұлан атынан 6655 әскери бөлімінің арнайы мақсаттағы 3-батальоны құрамындағы атқыштар взводының 1-гранатометшілер бөлімшесінің аға маманы Руслан Қазыбай қатысты.
66 келі салмақ дәрежесінде сынға түскен ұландық физикалық дайындық, жауынгерлік рух және шеберлік деңгейін жоғары көрсетіп, табандылық пен кәсібиліктің арқасында турнирдің барлық бастапқы кезеңінен сәтті өтті. Ал шиеленіске толы финалда күміс медаль иеленді.
- Мен Ұлттық ұлан атын республикалық деңгейде таныта алғаныма мақтанамын. Маған сенім білдіріп, қолдау көрсеткен Бас қолбасшылыққа алғысымды білдіремін. Бұл бізге тек қызметтік міндеттерімізді орындауға ғана емес, спорт саласында да дамуға мүмкіндік береді. Маған сенген тәлімгерлерім мен жауынгер достарыма ерекше алғыс айтамын. Олардың сенімі – мен үшін ең күшті мотивация. Бұл жетістік – біздің ортақ нәтижеміз, - деді Руслан Қазыбай.
Айта кетейік, бұл жетістік үздіксіз жаттығулардың, мақсатқа ұмтылудың және жеңіске деген құштарлықтың нәтижесі болды. Ұлттық ұлан өз әскери қызметшілерін мақтан тұтады. Олар тек қызметтік міндеттерін ғана орындап қоймай, елімізді спорттық ареналарда да лайықты танытып жүр.
