Ұлттық ұланда “Мектепке жол” дәстүрлі акциясы өтті, — деп хабарлайды Polisia.kz.
Жаңа оқу жылы қарсаңында Ұлттық ұланның 5510 әскери бөлімінің әскери қызметшілері Көкшетау қаласында көпбалалы отбасылардың балаларын қуанышқа бөледі.
Әлеуметтік қолдау мақсатында ұйымдастырылған “Мектепке жол” акциясы аясында бүлдіршіндерге мектеп сөмкелері, түрлі кеңсе тауарлары, дәптерлер мен оқу құралдары табыс етілді. Бұл бастама – оқушылардың жаңа оқу жылына толыққанды дайындалуына жағдай жасауға бағытталған игі қадам.
Әскери бөлім басшылығы мұндай шаралардың маңызы ерекше екенін атап өтті.
— Балаларға қолдау көрсету, жас ұрпақтың қамын ойлау – бұл тек әлеуметтік міндет қана емес, елдің болашағына қосқан үлесіміз деп білеміз. Осындай игі дәстүрлер қоғам мен әскер арасындағы сенімді нығайтып, әлеуметтік мәселелерді шешуге нақты ықпал етеді, – деді командирлік құрам өкілдері.
Көкшетаулық ата-аналар әскери қызметшілердің көрсеткен қамқорлығына ризашылықтарын білдіріп, жылы лебіздерін айтты. Ал балалар үшін мектепке қажетті құрал-жабдықтардан бөлек, мерекелік көңіл-күй де сыйға тартылды.
Бүгінде “Мектепке жол” акциясы Ұлттық ұланда жыл сайын дәстүрлі түрде жалғасып келеді. Бұл – жас буынға қолдау көрсетіп қана қоймай, әскери ұжымның қоғаммен тығыз байланыста екенін көрсететін маңызды әлеуметтік бастамалардың бірі.
ҚР ІІМ ҰҰ “Орталық” ӨңҚ Баспасөз қызметі
