Астана қаласындағы Мемлекеттік рәміздер алаңында ҚР ІІМ Ұлттық ұланының 5573 әскери бөлімінің Құрмет қарауыл ротасы Республика күніне орай патриоттық флешмоб ұйымдастырды, - деп хабарлайды Polisia.kz.
Ту көтерген айбынды сап, мінсіз қозғалыс пен дәл қадам – Отанға деген сүйіспеншілік пен әскери тәртіптің айқын көрінісіне айналды. Іс-шара барысында сарбаздар қарумен дефиле көрсетіп, жауынгерлік дайындық пен кәсіби шеберліктің жоғары деңгейін паш етті.
5573 әскери бөлімінің Құрмет қарауыл ротасы – Ұлттық ұланның мәртебесін айқындайтын ерекше бөлімше. Қазіргі таңда мұнда 80-ге жуық сарбаз Отан алдындағы борышын абыроймен өтеп жүр.
Рота командирі Мирхат Ахмадиев бұл іс-шараның негізгі мақсаты – ел рухын көтеріп, тәуелсіздік мерекесін ерекше форматта атап өту екенін атап өтті:
-- Біздің сарбаздар үшін Республика күні – аса қастерлі мереке. Біз флешмоб барысында әрбір қозғалысымыз арқылы Отанға деген сүйіспеншілікті жеткізгіміз келді, – деді ол.
Жеке ротаның аға нұсқаушысы Юлдашбек Қарабалаев қарумен дефиле көрсетілімінің жоғары деңгейде өтуіне жетекшілік етті. Ол сарбаздарға әрбір қимылдың дәлдігі мен үйлесімділігін үйретіп келеді.
- Қарумен дефиле – ұзақ жаттығулар мен табандылықтың нәтижесі. Әр бұрылыс пен қозғалыстың артында әскери тәртіп пен жауапкершілік жатыр, – деді ол.
Осылайша, Құрмет қарауыл ротасы Республика күніне арналған ерекше флешмоб арқылы ел бірлігі мен тәуелсіздіктің рухын айшықтап, Ұлттық ұланның айбынды бейнесін тағы бір мәрте танытты.
