Ұлытау облысы полиция департаменті 8 наурыз – Халықаралық әйелдер күнін салтанатты түрде атап өтті, - деп хабарлайды Polisia.kz.
Ұлытау облысы полиция департаменті 8 наурыз – Халықаралық әйелдер күніне арналған мерекелік іс-шара өткізді. Мереке аясында қызметте үздік нәтижелер көрсеткен қызметкерлер марапатталып, концерттік бағдарлама ұйымдастырылды.
Іс-шараға полиция департаментінің қызметкерлері, ардагерлер және қоғам белсенділері қатысты. Салтанатты бөлімде өз қызметінде жоғары көрсеткіштерге қол жеткізген бірқатар қызметкерлерге алғыс хаттар мен медальдар табысталды. Ұлытау облысының полиция департаментінің бастығы Қайыркен Әлиев өз сөзінде полиция қызметкерлерін және ардагерлерді мерекемен құттықтап, олардың қоғамдық тәртіпті қамтамасыз ету мен құқық қорғау саласындағы маңызды рөлін атап өтті.
- Бұл күн – әйелдердің қоғамдағы рөлін, олардың күш-жігері мен табандылығын айрықша атап өтетін ерекше мереке. Сіздердің әрқайсыңыздың өмірлеріңізде, отбасыларыңызда және жұмыстарыңызда бақыт, денсаулық және табыс тілеймін. Сіздер – біздің қоғамымыздың негізі, балаларымыздың тәрбиешілері және әрбір жетістігіміздің артында тұрған күшті тұлғасыздар, – деп атап өтті департамент басшысы.
Сонымен қатар қоғамдық жұмыстарға белсене қатысып, полициямен бірлесіп алдын алу шараларын жүргізген қоғам белсенділері мен үкіметтік емес ұйымдардың жетекшілері департаменттің алғыс хаттарымен марапатталып, құрметке бөленді.
Мерекелік концерт бағдарламасы қызықты лотереямен жалғасып, қонақтар бағалы сыйлықтарға ие болды.
