Ұлытау облысында ПД есептегі сотталғандарға профилактикалық кездесу ұйымдастырды, – деп хабарлайды Polisia.kz.
Ұлытау облысы полиция департаментінің ұйымдастыруымен пробация қызметі есепте тұрған сотталғандармен ақпараттық-профилактикалық кездесу өткізді. Іс-шараның мақсаты – нашақорлықтың алдын алу, қайта қылмыс жасау қаупін төмендету және қатысушыларды заңға бағынатын өмір салтына ынталандыру.
Кездесу барысында мамандар есірткі құралдарын қолданудың теріс салдары, олардың адам денсаулығына тигізетін физикалық және психологиялық зияны туралы жан-жақты түсіндірді. Сонымен қатар заңсыз сақтау, қолдану және тарату үшін көзделген қылмыстық жауапкершілік туралы ақпарат берілді. Қатысушыларға зиянды әдеттерден бас тарту дағдыларын қалыптастырудың, оң өмірлік ұстанымды дамытудың және жеке жауапкершілікті нығайтудың маңызы атап өтілді.
Сондай-ақ сотталғандарға волонтёрлік қызметке қатысу мүмкіндіктері таныстырылды. Әлеуметтік жағынан осал азаматтарға көмек көрсету, қоғамдық аумақтарды абаттандыру, профилактикалық іс-шараларға қатысу сияқты қоғамға пайдалы бастамалар туралы мәлімет берілді. Волонтёрлікке қатысу әлеуметтік бейімделуге, жауапкершілікті арттыруға және позитивті әлеуметтік байланыстарды қалыптастыруға ықпал ететіні айтылды.
Кездесуге қатысушылар белсенділік танытып, сұрақтар қойып, волонтёрлік жобаларға қатысуға ниет білдірді. Ұлытау облысы полиция департаменті пробация қызметімен бірлесіп, сотталғандардың қоғамға сәтті қайта бейімделуіне және қайталама құқық бұзушылықтың алдын алуға бағытталған жұмыстарды жалғастырады.
