Ұлытау облысында жас жол инспекторларының слеті өтті, – деп хабарлайды Polisia.kz.
Ұлытау облысының орталығында жол қозғалысы қауіпсіздігін насихаттауға арналған маңызды шара – Жас жол инспекторларының 20-шы республикалық слетінің облыстық кезеңі өз мәресіне жетті. Бұл мерейтойлық слет жас ұрпақтың жолда жүру ережелерін саналы түрде меңгеруіне, олардың жол ережелері мен жол белгілері туралы білімдерін арттыруға, сондай-ақ ойындық тапсырмалар арқылы танымдық қабілеттерін дамытуға бағытталған маңызды бастама болды.
Жол – өмір жолы, ал қауіпсіздік – оның басты кепілі. Осыны терең түсінген жас инспекторлар бүгін өздерінің білімдері мен дағдыларын жан-жақты көрсетті. Сайысқа қатысушылар 9 түрлі аталым бойынша бақ сынап, олардың әрқайсысы балалардың жол қауіпсіздігіне деген жауапкершілігін арттыруға және оларды жол қозғалысының саналы қатысушысы етіп тәрбиелеуге ықпал етті.
Сайыс барысында балалар өздерінің жол ережелері бойынша білімдерін, бірінші медициналық көмек көрсету дағдыларын, сондай-ақ жол белгілерін тану қабілеттерін көрсетті. Бұл іс-шара тек бәсекелестік алаңы ғана емес, сонымен қатар жас инспекторлардың бір-бірімен тәжірибе алмасуына және жол қауіпсіздігі саласындағы білімдерін толықтыруына мүмкіндік берді.
Сайыс соңында барлық қатысушылар өздерінің белсенділіктері мен білімдері үшін сыйлықтармен марапатталды.
