Ұлытау облысы Ұлытау ауданында жаңа учаскелік полиция пункті ашылды, – деп хабарлайды Polisia.kz.
Ішкі істер министрлігінің 2025 жылды “Профилактика жылы” деп жариялауына орай, бұл бастама аудан тұрғындарының қауіпсіздігін қамтамасыз етуге бағытталған маңызды қадам болып саналады. Жаңа полиция пункті қылмыстың алдын алу, қоғамдық тәртіпті нығайту және құқық бұзушылықтардың алдын алу мақсатында ашылды.
Салтанатты ашылу рәсіміне полиция департаментінің бастығы Қайыркен Әлиев, аудан әкімі Аманжол Мырзабеков және жергілікті тұрғындар қатысты. Өз сөзінде Қайыркен Әлиев полиция қызметкерлерінің қоғам қауіпсіздігін сақтау жолындағы еңбегіне алғыс білдіріп, профилактика жылында қылмыстың алдын алу мен қоғамдық қауіпсіздікті қамтамасыз ету – полиция қызметінің басты міндеті екенін атап өтті.
Жаңа полиция пунктінің ашылуы құқық қорғау органдары мен халық арасындағы байланысты нығайтып, тұрғындардың ұсыныстарын ескере отырып, қызмет сапасын арттыруға ықпал етеді. Заманауи техникамен жабдықталған ғимарат қылмыстық оқиғалар туралы жедел ақпарат жинауға, құқық бұзушылықтармен күресуге және қоғамдық қауіпсіздікті қамтамасыз етуге мүмкіндік береді.
Бұл бастама аудан тұрғындарының қауіпсіздігі мен тыныштығын қамтамасыз етуде маңызды рөл атқарады.
