Меркіде масаң күйде көлік басқарған шетелдік 7 жылға жүргізуші куәлігінен айырылды, – деп хабарлайды Polisia.kz.
Патрульдік полиция қызметкерлері Меркі — Шу — Бурылбайтал тасжолының бойында күдік тудырған DAF автокөлігін тоқтатты.
Полиция қызметкерлері тексеру барысында көлікті басқарған 31 жастағы өзбекстандық азаматтың масаң күйде екенін байқады. Медициналық сараптама жүргізушінің «орташа дәрежеде» масаң күйде болғанын растады.
Құқық бұзушы ҚР ӘҚБтК-нің 608-бабы 1-бөлімі бойынша сот шешімімен 15 тәулікке бас бостандығынан және 7 жылға көлік жүргізу құқығынан айырылды.
Полиция жол қозғалысына қатысушыларды заң талаптарын мүлтіксіз сақтауға шақырады. Жолдағы ережелерді бұзу, әсіресе, мас күйінде көлік басқару – ауыр құқық бұзушылық санатына жатады және заң аясында қатаң жауапкершілікке әкеп соғады.
