Жамбыл облысында полицейлер жасөспірімдер арасында құқықтық сауаттылықты арттыруға бағытталған дәрістер өткізуде, - деп хабарлайды Polisia.kz.
“Тәрбиені өзіңнен баста” ұранымен полицейлер жастарға дұрыс моральдық және этикалық құндылықтарды қалыптастырудың, жоғары азаматтық ұстанымдарды дамытудың және құқық бұзушылықтың алдын алудың маңыздылығын түсіндіруге тырысуда.
Бұл іс-шаралардың негізгі бағыттарының бірі – жасөспірімдер арасында топтық төбелестердің, қарақшылық шабуылдардың, бұзақылықтың, құмар ойындарға тәуелділіктің (лудомания) және буллингтің алдын алу.
Дәрістер барысында полицейлер мектеп ортасында достық пен өзара сыйластықты сақтаудың, сондай-ақ денсаулыққа және болашаққа теріс әсерін тигізетін жанжалдардан аулақ болудың маңыздылығын атап өтуде.
Полицейлер жоғары сынып оқушыларын кіші сыныптағы балаларға тәлімгерлік жасап, оларға заңдарды сақтау маңыздылығын түсіндіруге, құқық бұзушылықтың салдарын ұғынуға көмектесуге шақырды. Бұл тек мектепте салауатты атмосфераны қалыптастыруға ғана емес, сондай-ақ жасөспірімдердің өздерін үлгі тұтарлық тұлға ретінде көрсетуге мүмкіндік береді.
Аталған іс-шаралар Жамбыл облысындағы білім беру мекемелерінде белсенді түрде өткізілуде. Полицейлер мен оқушылар бірге білім ғана емес, ішкі құндылықтар да маңызды саналатын қауіпсіз орта қалыптастыруда. Бұл құндылықтар балалардың қоғамның жауапты азаматы болуына ықпал етеді.
