Жамбыл облысында полиция мен жасөспірімдер арасында ашық диалог ұйымдастырылды, - деп хабарлайды Polisia.kz.
Жамбыл облысында ішкі істер органдарында есепте тұрған балаларға арналған танымдық "Ашық есік күні" өтті. Іс-шараның мақсаты – құқық бұзушылықтың алдын алу, полиция қызметімен таныстыру және жасөспірімдердің заңға құрметпен қарауын қалыптастыру.
Балалар полиция департаментінің мұражайына барып, құқық қорғау органдарының тарихымен және қылмыспен күрес жолдарының даму барысымен танысты. Кейін олар уақытша ұстау изоляторында болып, ұсталған азаматтардың құқықтары және заңды сақтау маңыздылығы туралы ақпарат алды.
Жедел басқару орталығында оқушыларға қаладағы жағдайды бақылау және полиция әрекеттерін үйлестіру жұмыстары көрсетілді.
Ерекше қызығушылық тудырғаны – кинологтар мен криминалистер жұмысының көрсетілімі болды. Қызметтік иттер есірткі іздеу дағдыларын көрсетті, ал мамандар қылмыстарды ашудың заманауи әдістері туралы айтып берді.
Іс-шара соңында полиция қызметкерлері балалармен заңға бағыну мен өзгелердің құқықтарына құрметпен қараудың маңыздылығы туралы әңгіме өткізді.
Ұйымдастырушылардың айтуынша, мұндай іс-шаралар жасөспірімдердің әлеуметке бейімделуіне ықпал етіп, олардың дұрыс өмірлік жолды таңдауына көмектеседі.
