Жамбыл облысында полиция қызметкерлері оқушылармен профилактикалық кездесулер өткізді, - деп хабарлайды Polisia.kz.
Жазғы демалыс – бұл көптен күткен еркіндік, сергектік пен жарқын әсерлерге толы кезең. Алайда статистикалық деректерге сүйенсек, дәл осы уақытта жасөспірімдер арасындағы құқық бұзушылықтар саны күрт артады. Осыған байланысты Жамбыл облысының полиция департаменті мектеп оқушыларына, олардың ата-аналарына және жазғы лагерьлердегі тәрбиешілерге арналған маңызды кеңестер мен ескертпелерді назарға ұсынады.
Кәмелетке толмаған жасөспірімдердің түнгі уақытта заңды өкілдерінің қарауынсыз көшеде жүруіне заңмен тыйым салынған. Бұл талаптың бұзылуы тек әкімшілік жауапкершілікке ғана емес, сонымен қатар баланың өмірі мен денсаулығына да нақты қауіп төндіреді. Мұндай жағдайда ата-аналар да заң алдында жауап береді. Сондықтан бұл ережені қатаң есте ұстаған жөн.
- Достар – жасөспірім өмірінде ерекше орын алатын тұлғалар. Алайда кез келген орта қауіпсіз бола бермейді. Ұрлыққа, бұзақылыққа, төбелеске немесе вандализмге итермелейтін адамдардан бойды аулақ ұстаған абзал. Кейде "әзіл" деп басталған әрекеттер ауыр құқықтық салдарға, тіпті соттылыққа әкеп соғуы мүмкін, - дейді полиция қызметкерлері.
Цифрлық кеңістіктегі қауіп-қатерлер шынайы өмірдегіден кем түспейді. Бейтаныс адамдармен байланыс орнатудан, күмәнді хат алмасудан, жеке фотосуреттерді жіберуден сақ болыңыз. Агрессияға, зорлық-зомбылыққа немесе өз-өзіне қол жұмсауға итермелейтін ойындар мен "сынақтарға" қатыспаңыз. Егер қандай да бір мазасыз жағдай туындаса, бірден ата-анаңызға, мұғалімге немесе мектеп инспекторына жүгініңіз.
Балаңыздың кіммен араласатынын, қайда жүргенін және немен айналысып жүргенін біліп отырыңыз. Ашық әрі сенімді қарым-қатынас – көптеген келеңсіздіктің алдын алудың ең тиімді жолы. Жасөспірімдер ата-анасының қолдауын сезінсе, ол оларды теріс жолдан сақтайды.
Полиция ескертеді: заң талаптары жыл бойы қолданыста болады, демалыс кезі бұл ережеден тыс емес. Жасөспірімдер де өз әрекеттері үшін толық жауап береді.
