Полиция аға лейтенанты Айдос Мырзабековтің ерлігі ел есінде мәңгі сақталып қалды. Бүгінде батырдың ұлы Мадияр әке жолын жалғап, ішкі істер органдарында қызмет етуді мақсат етіп, Алматы академиясына оқуға қабылданды, - деп хабарлайды Polisia.kz.
2015 жылдың 6 желтоқсанында қызметтік борышын орындау үстінде полиция аға лейтенанты Айдос Мырзабеков жол-көлік апаты салдарынан қаза тапты. "Қару" жедел-алдын алу іс-шарасы барысында Бөлек ауылына іссапарға аттанған ол ерлікпен өмірден өтті. Қызметке адалдық пен Отанға шынайы сүйіспеншіліктің үлгісін көрсеткен батыр полицейдің есімі әріптестерінің жүрегінде мәңгі сақталады.
Айдос Серікжанұлының ұлы – Мадияр Серікжан да әке жолын жалғауды арман етіп өсіп келеді. 2007 жылдың 6 желтоқсанында дүниеге келген ол бүгінгі күні Еңбекшіқазақ ауданы, Есік қаласындағы В. Терешкова атындағы орта мектептің 11-сынып оқушысы. Үздік үлгерімімен көзге түскен Мадияр бала күнінен-ақ ішкі істер органдарында қызмет етуді өзіне мұрат тұтқан.
Бүгінде ҚР Ішкі істер министрлігінің қолдауымен Мадияр Қазақстан Республикасы Ішкі істер министрлігінің Алматы академиясына жедел-іздестіру қызметі мамандығы бойынша оқуға қабылданды. Академияға құжаттарын тапсырмас бұрын ол әкесінің қызмет еткен бөлімшесіне арнайы барып, Еңбекшіқазақ аудандық полиция басқармасы жанындағы Даңқ аллеясында тағзым етті. Бұл қадам – әке аманатына адалдығының айқын дәлелі әрі үлкен өмір жолына нық қадам басқанының белгісі.
Бұл – жас түлектің орындалған арманы ғана емес, әкесінің рухына тағзым, оның Отанға адал қызметін лайықты жалғастыруға деген берік серті.
