Жетісу облысы полиция департаментінде профессор Марат Қоғамовпен кездесу өтті, – деп хабарлайды Polisia.kz.
Жетісу облысы полиция департаментінде заң ғылымдарының докторы, профессор, Қазақстан Республикасы Ұлттық ғылым академиясының құрметті академигі, еліміздің еңбек сіңірген заңгері Марат Қоғамовпен маңызды кездесу өтті.
Іс-шараға полиция департаментінің басшылығы, Қазақстан Республикасының сыбайлас жемқорлыққа қарсы іс-қимыл агенттігінің (Антикоррупциялық қызмет) Жетісу облысы бойынша департаментінің басшылығы және өңірдің полиция қызметкерлері қатысты.
Марат Қоғамов – Қазақстан Республикасының қылмыстық іс жүргізу кодексінің тең авторы, оның түсіндірмелерінің авторы, сондай-ақ отандық қылмыстық іс жүргізу құқығының дамуына айтарлықтай үлес қосқан ғалым.
https://youtu.be/I07X5qQyAt0
Кездесу барысында ол заң талаптарының қатаң сақталуының маңыздылығына, әсіресе, жұмысы қылмыстық іс жүргізу кодексімен тығыз байланысты тергеушілер мен анықтаушылардың қызметіне ерекше назар аударды.
Құқық қолдану практикасы мен заң ғылымының дамуына қосқан үлесі үшін профессорға полиция департаменті бастығының атынан Алғыс хат және естелік сыйлық табысталды.
Ғылым мен құқық қорғау органдарының өзара әрекеттестігі заңдылық пен құқықтық тәртіпті қамтамасыз етуде маңызды рөл атқарады. Мұндай кездесулер кәсіби тәжірибе алмасуға мүмкіндік беріп, құқық қорғау жүйесін жетілдіруге ықпал етеді.
