Жетісу облысында 24 есірткі сатушы мен есірткіні жасырып қойып кетуші жауапқа тартылды, – деп хабарлайды Polisia.kz.
Жетісу облысында есірткіге қатысты 160-тан астам құқық бұзушылық анықталып, заңсыз айналымнан 300 келіге жуық есірткі тәркіленді. Өңірдің құқық қорғау органдарының күшімен 17 есірткі сатушы мен 7 есірткіні жасырып қойып кетуші ұсталып, жауапқа тартылды.
Жалпы айналымнан 297 келі 300 грамм түрлі есірткі заттары алынды. Олардың ішінде 10 келіден астам гашиш, 4 келіге жуық синтетика, яғни химиялық жолмен өндірілген есірткі, сондай-ақ 200 келіден астам марихуана мен қарасора бар. Мемлекет Басшысы Қасым-Жомарт Тоқаевтың синтетикалық есірткілерді өндіруге және таратуға қарсы күресті жандандыру туралы тапсырмасын орындау мақсатында өңірде есірткі таратушылар мен синтетиканы жасырып салушыларын анықтау жұмыстары едәуір күшейтілді.
– Әсіресе, интернет-ресурстардың есірткі бизнесін кеңейту үшін пайдаланыла бастағаны, сонымен қатар мұндай қылмысқа 17 мен 25 жас аралығындағы жастарды тарту ерекше алаңдатады. Бұл көбінесе синтетикалық есірткіні жасырып кетушінің рөлін атқаратын мектеп оқушылары мен студенттер. Мысалы наурыз айында полиция «жасырып кету» жолымен синтетикалық есірткілерді таратумен айналысқан Талдықорған қаласындағы кешкі мектептердің бірінде оқитын оқушыны ұстады. Тінту кезінде одан 107 грамнан астам психотроптық есірткі, сондай-ақ орауыш материалдар мен электронды таразылар тәркіленді. Кейін ол 3 жылға шартты түрде бас бостандығынан айырылды. Талдықорғанда жалдамалы пәтерде есірткі затын сақтап, ораумен айналысқан көршілес Алматы облысынан келген 20 жастағы бойжеткен де 10 жылға бас бостандығынан айырылды. Ұсталғаннан 2 келі 300 гр синтетика тәркіленді, – деді Жетісу облысы ПД бастығының орынбасары Руслан Чарапиев.
Өңірде жүргізілген жедел және арнайы іс-шаралар барысында үш есірткі тобының қылмыстық әрекеті жойылды. Олар Панфилов, Қаратал аудандары мен Текелі қаласында заңсыз әрекетпен айналысқан.
– Тергеу барысында қылмыстық топтарға қатысы бар 11 адам анықталып, ұсталды. Күдіктілер каннабис тобының есірткі заттарын, сондай-ақ «синтетиканы таратумен айналысқан. Оларды ұстау кезінде 4 келіге жуық әртүрлі есірткі заттары, оның ішінде 100 грамдай синтетика тәркіленді. Сонымен қатар ұсталғандардың бірінен бұрын ұрланған қару алынды, – деп атап өтті Р. Чарапиев.
Сонымен қатар құрамында есірткі бар өсімдіктерді заңсыз өсіргені үшін 12 есірткі плантациясы анықталып, иелері жауапқа тартылды. Өсіру фактілері Ескелді, Панфилов, Сарқан, Қаратал аудандарында, сондай-ақ Талдықорған және Текелі қалаларында тіркелді. Ұсталғандардың басым бөлігі бұрын осыған ұқсас қылмысты жасаған үшін жауапкершілікке тартылғаны анықталды.
