Жетісу облысында оқушылар жарық шағылыстырғыш кеудешелермен қамтамасыз етілді, – деп хабарлайды Polisia.kz.
Жетісу облысында балалардың жол қауіпсіздігін қамтамасыз ету бойынша жүйелі жұмыс жүргізілуде. Текелі қаласында екінші ауысымда оқитын 2–6 сынып оқушылары жарық қайтаратын кеудешелермен толық қамтамасыз етілді — барлығы 2 500 оқушы жолда көзге бірден түсетін арнайы жиынтықтар алды. Балалар қауіпсіздігін нығайту бастамасын полиция қызметкерлері, ата-аналар, Текелі қалалық білім бөлімі және білім басқармасы қолдады.
Полиция қызметкерлері атап өткендей, балаларға қамқорлық — бір реттік шара емес, қоғамның барлық институттары қатысатын тұрақты жұмыс. Балалар — біздің болашағымыз, олардың қауіпсіздігі — баршаның ортақ міндеті. Қазақстан Республикасының Президенті Қасым-Жомарт Тоқаев бірнеше рет атап өткендей, балалар — біздің басты байлығымыз әрі болашағымыз.
Бүгінде балалардың жолдағы қауіпсіздігі — маңызды мәселелердің бірі. Жарық шағылыстырғыш кеудешелер мен көріну элементтері бар киімдер жүргізушілерге баланы алыс қашықтықтан байқауға мүмкіндік береді, әсіресе ауа райы қолайсыз кезде немесе қараңғы уақытта. Бұл шаралар мектеп оқушыларының қатысуымен болатын жол-көлік оқиғаларының алдын алуға айтарлықтай көмектеседі.
Сонымен қатар полиция қызметкерлері күн сайын мектептердің жанындағы жаяу жүргіншілер өткелдері мен қиылыстарда кезекшілік жүргізіп, балаларға жолды қауіпсіз кесіп өтуге көмектеседі. Бұл тәжірибе оқушыларды қорғап қана қоймай, қоғамда жолдағы жас қатысушыларға ұқыпты қарау мәдениетін қалыптастырады. Жетісу облысында балалардың қауіпсіздігі — болашақтың берік негізі. Оларға қамқорлық көрсету әрқашан мемлекет басымдығы болып қала береді.
