Жетісу облысында отбасылық зорлық-зомбылықтың алдын алу жолдары талқыланды, - деп хабарлайды Polisia.kz.
Жетісу облысында полиция қызметкерлері, мемлекеттік органдар мен қоғамдық ұйым өкілдері бірлесіп, отбасылық зорлық-зомбылықтың алдын алу мәселесіне арналған дөңгелек үстел өткізді.
Кездесу барысында қатысушылар отбасындағы зорлық-зомбылықтың қайталануын болдырмау, оған жол бермеу және зардап шеккендерге көмек көрсету бойынша бірқатар маңызды мәселелерді талқылады.
Қазақстан Республикасы Ішкі істер министрлігінің тапсырмасына сәйкес, ведомствоаралық "Жұмыс тобы" құрылып, нақты іс-қимыл алгоритмі әзірленді. Бұл топтың басты міндеті – отбасылық агрессормен жеке профилактикалық жұмыстар жүргізу, зорлық-зомбылық құрбандары мен куәгерлеріне қолдау көрсету және оларды оңалту шараларын ұйымдастыру.
Сот шешімімен агрессорға қойылған ерекше талаптар аясында оның денсаулық сақтау мекемелерінде психологиялық көмек алуына жағдай жасау мәселесі де қарастырылды.
Жұмыс тобының басты мақсаты – отбасындағы зорлық-зомбылықтың алдын алуда кешенді амалдар қолдану. Бұл бағытта агрессормен, жәбірленуші мен куәгермен жүйелі жұмыс жүргізудің маңызы зор. Кездесуде әр тарап өз тәжірибесімен бөлісіп, әлеуметтік мәселелермен күресте бірлескен әрекеттің тиімділігін атап өтті.
Мамандардың пікірінше, осындай үйлестірілген жұмыстар отбасыларда тұрақтылықты сақтау мен қоғамдағы зорлық-зомбылық деңгейін төмендетуге ықпал етеді.
