Жетісу облысында полицейлер мас жүргізушіні құрықтады, – деп хабарлайды Polisia.kz.
"Ештеңе болмайды" деп ойлап, кейбір жүргізушілер ең ауыр қателік жібереді. Көлікті мас күйде басқару – жол қозғаласының қатысушыларына қауіп төндіретін әрекет.
Түнгі кезекшілік кезінде полицейлер Hyundai автокөлігінің жүргізушісі патрульдік экипажды көрген сәтте бой тасалауға тырысқанын байқады. Инспекторлар дереу жарық және дыбыс сигналдарын беріп, жүргізушіге тоқтау талабын қойды. Көлік тоқтатылғаннан кейін жүргізушінің алкогольдік мас күйде екені анық байқалды. Полицейлер одан спирт иісін сезіп, жүрісінің тұрақсыздығын және сөйлеу қабілетінің бұзылғанын тіркеді.
Медициналық куәландыру ұсынылып, оның нәтижесі жүргізушінің расында мас болғанын растады. Құқық бұзушы ұсталып, әрі қарайғы процессуалдық шаралар үшін полиция бөліміне жеткізілді. Автокөлік айыптұраққа қойылды. Іс материалы сотқа жолданды. Аталған азамат заңға сәйкес, 7 жыл мерзімге көлік басқару құқығынан айырылуы ықтимал.
Рөлдегі жауапсыздықтың құны өте жоғары. Полиция адамдардың өмірі мен қауіпсіздігін қауіпке тіккен әр жүргізуші заң алдында міндетті түрде жауап беретінін ескертеді. Өзіңіздің де, өзгенің де өмірін қатерге тікпеңіз.
