Жетісу облысында құқық бұзушылықтың алдын алу жұмыстары күшейтілуде, - деп хабарлайды Polisia.kz.
Бейсен Құранбек атындағы журналистер үйінде Жетісу облысы полиция департаментінің жергілікті полиция қызметі басқармасының бастығының қатысуымен "Заң және тәртіп: 2025 жылдың 1-тоқсанындағы жұмыс қорытындысы" тақырыбында брифинг өтті.
Жыл басынан бері облыс бойынша 47 мыңнан астам әкімшілік құқық бұзушылық анықталды. Олардың басым бөлігі жол қозғалысы ережелерін бұзу деректерімен байланысты. Атап айтқанда, 29 500-ден астам заңбұзушылық тіркелсе, оның ішінде:
– 1600-ден астамы – жылдамдықты асыру;
– 2900-ге жуығы – көлік құралдарын пайдалану қағидаларын бұзу;
– 1300-ден астамы – жүргізушінің көлік басқару кезінде телефон қолдануы;
– 3700-ге жуығы – жаяу жүргіншілер тарапынан жол ережелерін бұзу;
– 142 азамат – көлікті мас күйінде басқару деректері.
Сонымен қатар отбасылық зорлық-зомбылықтың алдын алу мақсатында 763 құқық бұзушыға қорғау нұсқамасы қойылып, 128 адамға ерекше талаптар белгіленді. Оның ішінде 86 тұлғаға алкогольдік ішімдіктерді тұтынуға шектеу қойылды.
2023 жылдың 1 шілдесінен бастап Мемлекет басшысының тапсырмасымен отбасылық агрессорлардың жауапкершілігі күшейтілген болатын. Осы жылдың алғашқы үш айында өңірде 268 арыз-шағым тіркеліп, барлығы сотқа жолданды.
Полиция қызметкерлері ата-аналармен, балалармен құқықтық түсіндіру жұмыстарын жалғастыруда. Заңға бағынатын, саналы азаматтарды тәрбиелеу – тек тәртіп сақшыларының ғана емес, бүкіл қоғамның ортақ міндеті. Бұл бағытта жұртшылықтың белсенділігі артып, елдің болашағына бей-жай қарамайтын ұрпақ қалыптасса, Қазақстан дамыған және құқықтық мәдениеті жоғары мемлекетке айналатыны сөзсіз.
