Жетісуда Жаңа жылдың бес күнінде түнгі уақытта ата-анасыз жүрген 42 жасөспірім анықталды, – деп хабарлайды Polisia.kz.
Жетісу облысында полицейлер құқықтық тәртіпті сақтау және кәмелетке толмағандарды қорғауға бағытталған профилактикалық іс-шара өткізді. Шара барысында түнгі уақытта қоғамдық және ойын-сауық орындарында ата-анасы немесе заңды өкілдерсіз жүрген жасөспірімдерге қатысты заң бұзушылықтар анықталды.
Заңнамаға сәйкес, кәмелетке толмағандардың 22:00-ден 06:00-ге дейін осындай орындарда болуына тыйым салынады. Дегенмен, профилактикалық іс-шаралардың нәтижесінде бұл ережені бұзған 42 жасөспірім анықталып, әкімшілік жауапкершілікке тартылды.
Мұндай іс-шаралар ата-аналардың балаларының қайда жүргенін бақылаудың маңыздылығын арттыруға және олардың қауіпсіздігіне қатер төндіруі мүмкін жағдайлардың алдын алуға бағытталған. Полиция өкілдері бұл іс-шараның негізгі мақсаты — жазалау емес, құқық бұзушылықтардың алдын алу және кәмелетке толмағандар үшін қауіпсіз орта қалыптастыру екенін атап өтті.
Профилактикалық жұмыс аясында полицейлер жасөспірімдер мен олардың ата-аналарымен түсіндіру жұмыстарын жүргізіп, қолданыстағы ережелерді сақтау және оларды бұзған жағдайда туындайтын жауапкершілік туралы ескертті.
